ព្រះសីហនុ៖ មនុស្សប្រុសស្រីចំនួន ២នាក់ដែលជាគូសង្សារនឹងគ្នា កំពុងតែអង្គុយសាសងគ្នាក្រោមដើមឈើសុខៗ ស្រាប់តែមែកឈើបាក់សង្កត់ពីលើបណ្តាលឱ្យរងរបួសធ្ងន់ទាំងពីរនាក់។ ហេតុការណ៍នេះបានកើតឡើងនៅយប់រំលងអធ្រាត្យម៉ោង១២កន្លះ ឈានចូលថ្ងៃទី២៨ ខែធ្នូ ឆ្នាំ២០២២ នៅលើកោះតាគៀវ ក្នុងបឹងកាឡូស្ថិតក្នុងភូមិអុង ឃុំរាម ស្រុកព្រៃនប់ ខេត្តព្រះសីហនុ។

ជនរងគ្រោះទាំងពីរនាក់ដែលបានមកកម្សាន្តលេងនៅលើកោះតាគៀវ មានអាយុ ២២ឆ្នាំដូចគ្នា ដោយជនរងគ្រោះជាបុរសរងរបួសត្រង់ក្បាលធ្ងន់ធ្ងរ ហើយជនរងគ្រោះជាស្ត្រី រងរបួសដៃ និងដើមទ្រូងធ្ងន់ធ្ងរ។ បុរសជនរងគ្រោះមានមុខរបរជាអ្នកថតរូប ហើយស្ត្រីជនរងគ្រោះជាអ្នកឆុងកាហ្វេ។

ក្រោយឧបទ្ទវហេតុនេះកើតឡើងភ្លាម ជនរងគ្រោះទាំងពីរនាក់នោះត្រូវបានរថយន្តសង្គ្រោះរបស់មូលដ្ឋានសមុទ្ររាម បញ្ជូនទៅសង្គ្រោះនៅមន្ទីរពេទ្យបង្អែកខេត្តព្រះសីហនុ៕